О́skemendegi oblystyq drama teatrda osy mádenıet ordasynyń negizin qalaýshy ónerpazdardyń biri, qazaq trýppasynyń beldi aktrısasy Gúlbaqyt Baqtybaevanyń benefısi ótti.
Eńbek jolyn Zaısan halyq teatrynan bastap, keıin Aqjar jáne Jańalyq halyq teatrlarynda aktrısa hám rejısser qyzmetterin atqaryp, 2002 jyly oblys ortalyǵyna kelgen talant ıesi bul kúni áriptesteriniń jyly lebizin estip tórde shalqaıyp otyrǵan joq, úırengen sahnasyna shyǵyp, ónerin pash etti. Kórermender nazaryna «Til tabysqandar» komedııasyn usynyp, basty róldi somdap, jankúıerleriniń qoshemetine bólendi.
Jalpy, Gúlbaqyt Baqtybaevany áriptesteri komedııa janryna kelgende qamshy saldyrmaıtyn aktrısa retinde tanıdy. Úlgili, ónegeli, ónerli otbasy retinde erekshe qurmetteıdi. «О́skemende qazaq teatry qurylǵannan beri Gúlbaqytpen qanattasa eńbek etip kelemiz. О́mirlik serigi belgili akter Qanat Nııazbekov te osy teatrda jumys isteıdi. Aktrısanyń ereksheligi sol, únemi shyǵarmashylyq izdeniste júredi. Onyń eńbekqorlyǵyna, izdenisine tántimiz. Osydan birer jyl buryn Qyrǵyzstanda úlken teatr festıvali boldy. Biz Jeńishgúl О́zbekovanyń «Tolǵaq» spektaklin apardyq. Men Umaı eneniń, ol meniń kelinim rólinde oınady. Sol baıqaýda biz birinshi oryndy ıelendik. Gúlbaqyt bala kótere almaı, naýqastanǵan, ómirden túńilip, tipti ózin-ózi ólimge qııýǵa deıin baratyn kelinshektiń rólin somdady. Osy rólde áriptesimdi basqa bir qyrynan tanyǵandaı boldym», - deıdi aktrısanyń áriptesi Saırash Qopabaeva.
Shara barysynda aktrısany qazaq teatrynyń kórkemdik jetekshisi Sahan Ákeleev, jastar teatrynyń kórkemdik jetekshisi Aıdyn Salbanov pen teatrdyń orys trýppasynyń ujymy quttyqtap, jyly lebizderin bildirdi.
Azamat QASYM, «Egemen Qazaqstan»